Indoda

Yile ndoda inde, inde ke le ndoda,

ifake eziluhlaz’ iijezi,

abayicingel’ ukuba yohamba phezu kwamanzi;

suka yona yakheth’ ukudibana noo-anti bamandulo,

nditsh’ oo-anti bamabhulu, abathwel’ imihohoma yasendulo,

abo babemagam’ amsulwa njengooBetsie

nabo babemagam’ avus’ umnyele njengooVelevutha,

suka yahlala nabo kwaphungwa,

incume olusuk’ ezants’ uncumo,

olungenaluhanahaniso nankwalambisa,

ngaloo mehlo adulis’ okusentliziyweni

ezo nkumbulo zantlandlolo, sekwabaleka naloo nzondo.

 

Yile ndoda inde, inde ke le ndoda,

ifake eziluhlaz’ iijezi,

abayicingel’ ukuba yotyis’ abampofu;

ngezonkan’ ezihlanu neentlanzan’ ezimbini,

suka yona yaboph ‘ amanxeb’ antlandlolo,

ngezandla zayo zozibini,

yaxhom’ ezakulonqind’ iiglavu,

yasivul’ isandla laswabuluk’ inqindi

yabaxhawula; ibaxhawula

ngezandl’ ezishushu, ingathwele nzondo nangqumbo.

 

Yile ndoda inde, inde ke le ndoda,

ifake eziluhlaz’ iijezi,

abayicingel’ ukuba yojik’ amanz’ abe yiwayini,

suka yona yalityath’ emagxen’ eli lizwe

njengendod’ ityath’ umntwana wayo,

indod’ eyayisesiqithini,

indod’ ebuso bungazange babonwa,

obuzel’ iintanda zaseSharpeville,

ziilet’ ezaphul’ intliziyo zooRuth First,

ubukrakra beminyak’ evakalayo,

yolangazelelo lomntwana nenkosikazi,

yavalelwa kwezimnyama, yee gingci nemivalo

yazitshixela kuyo iingcamango zayo, yacamngca,

yathi gqi elubala, yaziqoqosha nezo ngcamango.

 

Yile ndoda inde, inde ke le ndoda,

ifake eziluhlaz’ iijezi, ijez’unombolo sikisi,

efun’ ukulibek’ ezandleni zethu sonk’ eli lizwe,

ilidlulisa ngobukhul’ ubuchule, kanye njengebhol’ ombhoxo

Indod’ ende eyakha yasesiqithini

eyasuka yafana nelitye; indumasi yalo lonke jikelele,

indod’ eyayithwel’ ubuntu ngocikizeko.

Nkosi Sikelel’ iAfrika

 

(c) Clinton V. du Plessis, 2013, translated in isiXhosa by Fikiswa Magqashela